carroce

Carroce, m. penac. ou bien Carroche, est un mot Italien puis nagueres naturalizé en France, et signifie une espece de coche à ciel suspendu en imperiale, à rideaux, accoudoirs et marchepieds, servant pour la ville et pour les champs, Carruca. Duquel mot Latin, l'Italien Carroccio ou Carrozza semble estre venu. Carroche aussi (comme escrit Ricordano Malespini) estoit le char sur quatre rouës peint en rouge, sur lequel estoient eslevez deux grands masts de mesme couleur sommez d'un grand estendart ventilant, aux armes de la Republ. de Florence, mi-parti de blanc et de rouge, lequel char estoit tiré à une paire de grands boeufs houssez de drap rouge, ne servants qu'à cela. Le conducteur desquels estoit franc de devoirs et subsides. Et en usoient les Florentins de jadis par triomphe, bobance et grandeur, et le menoient au devant des Princes venans à Florence. Et quand ils alloient faire la guerre, les Contes et Chevaliers voisins le tiroient hors de l'oeuvre de Saint Jean, le conduisans en la place du marché-neuf de Florence, où ils le mettoient entre les mains du peuple, lequel le conduisoit à l'armée, à quoy faire et pour le garder estoient deputez les plus vertueux, de plus d'effort et valeur de tout le peuple, et à iceluy carroche, comme à la principale enseigne, avoit l'oeil et se rengeoit toute l'armée.

Thresor de la langue françoyse. Jean Nicot.